ആണ്ടിലൊരിക്കൽ നാട്ടിലിറങ്ങും
നമ്മുടെ തമ്പ്രാൻ മാവേലി
ആരും കാണാ പാതാളത്തിൽ
നിന്നാണെത്തുക പതിവായി
ഇക്കുറി വന്നാൽ കോറണ്ടേനിൽ
കഴിയണമെന്നാ ണറിയിപ്പ്
അതുകൊണ്ടങ്ങേർ കർക്കിടകത്തിൽ
മഴയും കൊണ്ടാണിങ്ങെത്തി
മുന്നത്തെക്കുറി പ്രളയം കണ്ട്
പകച്ചു മടങ്ങിയതോർക്കുന്നു
എന്നാലന്നിവിടെല്ലാ മനസ്സും
ഒന്നായ് കണ്ടതിലാശ്വാസം!
മുൻ വർഷങ്ങളിൽ ആളെ കാണാൻ
മാളുകൾ തേടി നടക്കേണം
എന്നാലിപ്പോൾ ആളുകളെല്ലാം
പുരകളിലുണ്ട് സമാധാനം
ആരാരെല്ലാം എന്നറിയാതു
ള്ളാശങ്കയിലാണിന്നിപ്പോൾ
മുഖവും,മൂക്കും ,വായും മൂടിയ
മാനവരെല്ലാം ഒരുപോലെ
ദീന.വി. കോടശ്ശേരി
അഭിപ്രായങ്ങളൊന്നുമില്ല:
ഒരു അഭിപ്രായം പോസ്റ്റ് ചെയ്യൂ